KADO – Kumpulan Dongeng – Part 1

SINOPSIS

Kumpulan dongéng anu kasuguhkeun dina ieu buku sajéntréna lolobana carita pangalaman pribadi anu pinuh ku piomongeun, asalna mah sok didongéngkeun ka babaturan lamun keur ngariung. Éta carita dina waktu kajadiana mah boro-boro hayang seuri saeutik gé, teu saeutik dina waktu keur kajadiana mah matak pikareuweusan, pikawirangeun jeung pikanyeurieun sagala. Ngan ieu mah kabeneran anu nulisna wé boga bawaan tukang banyol jadi sakabéhna dipintonkeun saolah-olah lucu padahal mah heunteu, sumpah ieu mah wani diriungkeun.

Rupa-rupa kajadian anu kaalaman jeung anu tumiba jadi ilham jang bahan tulisan, da dongéng mah kumaha anu ngadongéngkeuna, lamun jelema tukang banyol pasti sagalana gé jadi banyol teu paduli waktu eukeur kajadiana mah matak éra paradah atawa kawiwirangan. Aya ogé dongéng anu balatak di urang Sunda anu sumebar teu puguh asal-usulna atawa carita anu panggih sawaktu dipanyabaan saterus didongéngkeun deui ka babaturan di tempat lain. Maklum tukang nulisna tukang aprak-aprakan da hirupna tukang pundah-pindah. Biasana sok ngabalakan heula ngadongéng hareupeun batur saterus lamun aya anu ngalayanan langsung didongéngkeun deui kanu lain.

Kadieukeuna mingkin éling geuning urang Sunda geus jarang anu ngamumulé kana budaya sundana téh komo barudak ayeuna mah boga alam sorangan anu teu kahontal ku kolot. Inget kana singketan ABCD anu kapanjangan Aksara Bahasa Carita Dangiang, lamun dijelaskeun aya tilu perkara anu ngahudangkeun urang Sunda nyaéta ku ngamumulé aksara, bahasa, jeung carita maka bakal hudang dangiang urang Sunda téh.

Lamun aya carita anu sarua di hiji wewengkon lain teu kudu himeng hartina sarua kénéh urang Sunda, omat ulah digujrudkeun meunding kénéh paaku-aku jeung Sunda deui tibatan diaku ku mahluk asing bisi barabé.